Бугун ўзбек дербиси бўлади, теннисчиларимиздан бири аниқ финалга чиқади

Ушбу мусобақанинг жуфтлик баҳсларида бугун ярим финал учрашувлари ўтказилади. Унда ўзбекистонлик ёш теннисчилар Жўрабек Каримов ва Ҳумоюн Султонов бир-бирларига қарши кортга чиқишади. Ҳар қандай ҳолатда ҳам улардан бири аниқ финалда ўйнайди.

Ҳумоюн Султонов қирғизистонлик Данияр Дулдаев билан бирга жуфтлик ҳосил қилган. Жўрабек Каримов эса хитойлик Аоран Ванг билан тандемда ҳаракат қилмоқда.

Маълумот учун, Ҳумоюн ва унинг шериги чорак финалда турнирнинг учинчи рақамли жуфтлиги ҳисобланган австралиялик теннисчилар - Адам ва Жейсон Тэйлор ҳамкорлигини 6:4, 6:1 ҳисобида мағлуб этганди. Каримов/Ванг жуфтлиги эса турнирнинг биринчи рақамли жуфтлиги - Хитой Тайпейи вакиллари Ти Чен/Хунгдан устун келган эди.