Бугун проф боксчимиз реванш жангида рингга кўтарилади

Оқшом доирасидаги қизиқарли жангларнинг бири ҳамюртимиз Улуғбек Ҳақбердиев иштирокида бўлиб ўтади. Профессионал бокснинг 72,6 кг, яъни ўрта вазн тоифасида ўз жангларини ўтказиб келаётган Улуғбек бугун реванш жангида иштирок этади. 

Ҳақбердиев олти раундга мўлжалланган жангда россиялик Карен Аветисянга қарши рингга кўтарилади. Бу икки боксчи 2017 йилнинг 4 март куни Россиянинг Краснодар ўлкасида ўзаро тўқнаш келишганди. Ўшанда дебют жангини ўтказган Улуғбек рақибини мағлубиятга учратган эди. 

Бугун чарм қўлқоп устамиз яна бир бор рақибини мағлуб этишга уриниб кўради. Бугунги жанг Ҳақбердиев учун проф рингдаги олтинчиси бўлади. Самарқандлик боксчимиз шу кунгача ўтказилган 5та жангнинг барчасида ғалаба қозонган. Учта жанг муддатидан аввал якунланган. 

Таққослаш учун, 35 ёшли Карен Аветисян шу кунгача 35та жанг ўтказган. 22та жангда мағлубият аламини тотиб кўрган, 3таси нокаут билан. 4та жангда дуранг натижа қайд этилган. Бор йўғи 9та жангда ғалаба зафар қучган. 4та жангда рақибларини нокаутга учратган. 

Тарозидан ўтиш маросимидан сурат