Бугун Tashkent Open-2016 турнирининг асосий тўр баҳслари старт олади

Соврин жамғармаси 250 минг долларни ташкил қилувчи ушбу турнир бу йил 18-маротаба ўтказилмоқда. Дунёнинг йигирмага яқин давлати теннисчилари иштирок этаётган мусобақада словакиялик Анна-Каролина Шмидлова биринчи рақам остида таснифланган. У дунё рейтингида 57-ўринни эгаллаб турибди.

Шунингдек, кучли юзталикдан жой олган бельгиялик Кирстен Флипкенс, швециялик Юханна Ларссон, туркиялик Чагла Буюкакчай, британиялик Наоми Броуди каби кўзга кўринган олтин тўп соҳибалари ҳам ўзбекистонлик теннис мухлислари кўз ўнгида ўз маҳоратларини намойиш этишади.

Юртимиз мутахассисларининг жорий мавсумни кўтаринки кайфиятда ўтказаётган Нигина Абдураимова ва Сабина Шариповадан умидлари катта.

Маълумот учун, ўтган йилги турнирда япониялик Нао Хибино бош мукофотни қўлга киритган эди. Кунчиқар юрт вакиласи ҳал қилувчи финал учрашувида хорватиялик Донна Векични икки сетда ҳам бир хил 6:2 ҳисобида мағлубиятга учратган эди.

Анъанага кўра, 29 ва 30 сентябрь кунлари машҳур теннисчилар болалар учун маҳорат сабоқларини намойиш этишади.