Бугун уч нафар, эртага эса яна бир теннисчимиз кортга чиқади

Унга кўра, биринчи бўлиб Максим Шин (ATP - 1107) Туркиянинг Анталья шаҳрида давом этаётган M 15 мусобақаси 1/16 финали доирасида германиялик Пол Ворнер (ATP - 907)га қарши кортга чиқади. Мазкур учрашув Тошкент вақти билан 14:00 да бошланади ва ғолиб нимчорак финал баҳсида мусобақанинг иккинчи рақамли теннисчиси, хорватиялик Дуе Айдукович (ATP - 391)га қарши баҳс олиб боради.

Яна бир теннис устамиз — Санжар Файзиев (ATP - 1180) эса Португалияда давом этаётган Челленжер мусобақасининг жуфтлик баҳслари нимчорак финали доирасида кортга чиқади. Россиялик Евгений Карловский (ATP - 314) билан биргаликда соврин учун курашаётган ҳамюртимизга бу босқичда Жонатан Эйсерик (ATP - 850) ҳамда Денис Молчанов жуфтлиги рақиблик қилади. Учрашув Тошкент вақти билан 15:00 да бошланиши режалаштирилган.

Шунингдек, бугунги кун доирасида Қатардаги M 15 мусобақаси жуфтлик баҳсларида иштирок этаётган Ҳумоюн Султонов (ATP - 490)/Парикшит Сомани жуфтлиги ҳам кортга чиқиши кутилмоқда. Уларга нимчорак финал доирасида Вивек Коллуру/Крис Кравсевиц рақиблик қилади. Учрашув бизнинг вақти билан 20:30 да старт олади.

11 январь тонгида эса Australian Open'да иштирок этаётган ягона ўзбекистонлик — Нигина Абдуримова (WTA - 176) саралаш босқичи ярим финалида кортга чиқади. Америкалик Кэти Волнейц (WTA - 115)га қарши кечиши кутилаётган учрашув Тошкент вақти билан 09:30 дан сўнг бошланади.