Бугун Винус Уильямснинг туғилган куни!

Винус ўзининг 41 ёшини нишонламоқда.

Винус Эбони Старр Уильямс 1980 йил 17 июнда Линвуд шаҳрида (АҚШ) туғилган. Профессионал фаолиятини 1994 йилда бошлаган. У фаолияти давомида WТА таснифидаги турнирларнинг 49 та яккалик ва 22 та жуфтлик мусобақаларида ғолиб чиқди, шу билан бирга 42 173 992 доллар мукофот пулига эга бўлди.

Уильямс "Катта Дубулға" туркумидаги еттита турнирда ғолиб чиққан: 2000, 2001, 2005, 2007 ва 2008 йилларда "Уимблдон", 2000 ва 2001 йилларда эса "US Open"да. Шунингдек, у 2003 йилги Австралия очиқ чемпионати, 2002 йилги "Ролан Гаррос" ва 2017 йилги Австралия очиқ чемпионатининг финал босқичларида ўйнаб, барчасида синглиси Серенага ютқазган.

2002 йил феврал ойида Винус биринчи марта WТА рейтингининг етакчисига айланди ва дунёнинг биринчи ракеткаси мақомида жами ўн бир ҳафта ўтказди. Шунингдек, америкалик спортчи жуфтликлар бўйича ҳам дунёнинг биринчи ракеткасига айланди.

Унинг "Катта Дубулға" турнири жуфтликдаги ўн уч ғалабаси ва яна иккита аралаш жуфтликда унвони бор. 1999 йилда Уильямс АҚШ терма жамоасида “Федерация Кубоги”да ғалаба қозонди. 2000 йилда Сидней Олимпиадасида у яккалик баҳсларида олтин медални қўлга киритди. Айни пайтда Винус Уильямс жаҳон рейтингида 103-ўринни эгаллаб турибди.

Америкалик теннисчи бўш вақтларида караокеда қўшиқ куйлашни яхши кўради, шунингдек, расм чизиш ва шеър ёзишни ёқтиради.