Бунақаси ҳали бўлмаганди. Eтти нафар дзюдочимиз жаҳон рейтинги пешқадами!

Хабарингиз бор, жаҳон чемпиони Давлат Бобонов (-90 кг) ҳамда Диёра Келдиёрова (-52 кг) катталар ўртасида ўз вазн тоифаларида рейтинг карвонбошиси бўлиб туришибди. Шунингдек, 5 нафар ўсмир ва ёшларимиз ҳам дунё рейтингида пешқадамликни ўз қўлларига олишди. 

Шу йил Босния ва Герцеговинанинг Сараево шаҳрида ўтган кадетлар ўртасидаги жаҳон чемпионати ғолибаси Барчиной Қодирова (-70 кг), кадетлар ўртасида Осиё чемпиони, “Осиё болалари” мусобақаси ғолибаси Лазиза Ҳайдарова (-40 кг), Эквадорнинг Гуаякил шаҳрида ўтган ёшлар ўртасидаги жаҳон чемпионати ғолиби Жаҳонгир Маматраҳимов (-90 кг), ушбу мусобақанинг кумуш медали соҳиби Азизбек Ортиқов (-66 кг), бронза медали эгаси Исломбек Равшанқулов (+100 кг) ўз вазнларида жаҳон рейтингини бошқариб туришибди.