Бухородаги турнирнинг асосий тўрида 12 теннисчимиз ўйнайди

Соврин жамғармаси 25 000 АҚШ долларини ташкил қилувчи ушбу мусобақанинг сўнгги саралаш баҳслари ўтказилиб, асосий тўрга йўлланма олган барча теннисчилар номи маълум бўлди.

Унга кўра, 12 нафар теннисчимиз ана шу йўлланмани қўлга киритди. Ҳамюртларимиздан Санжар Файзиев, Темур Исмоилов, Сергей Фомин, Азизбек Луқмонов, Павел Цой ва Саидъало Саидкаримов тўғридан-тўғри асосий тўрда қатнашиш ҳуқуқини қўлга киритишганди.

Улар сафига Шохрух Абдумаликов, Аброр Исоқов, Григорий Рейтман, Олимжон Набиев, Шониғматжон Шофайзиев, Азамат Луқмоновлар қўшилишди.

Қуръа натижасига кўра, Фомин биринчи даврада турнирнинг биринчи ракеткаси, қозоғистонлик Дмитрий Попкога қарши кортга чиқади. Мусобақада 8-рақам остида таснифланган Исмоилов россиялик Евгений Тюрнев билан ҳисоб-китоб қилади. 

Павел Цой украиналик Вадим Урсу билан муносабатларига ойдинлик киритиб олади.