Canadian Open. Учинчи ракеткамиз асосий тўрга йўл олди

Ушбу мусобақада мамлакатимизнинг биринчи ва учинчи рақамли теннис маликалари - Камилла Раҳимова ҳамда Полина Кудерметова ҳам ўз омадини синаб кўрмоқда. Раҳимова рейтингдаги ўрнига бўйича тўғридан-тўғри асосий тўр баҳсларига киришса, Кудерметова саралаш турнири орқали асосий тўрга йўлланма олди. 

Ўзбекистоннинг учинчи ракеткаси саралашнинг финалида WTA рейтингида 1253-поғонада бораётган ва саралашга имтиёзли йўлланма (WC) асосида қўйилган канадалик Авери Александерни бироз қийинчилик билан мағлубиятга учратди - 6/4, 6/4. Ҳар икки теннисчи ҳам 2 тадан эйс зарбасини амалга оширди. Қўшхатолар Полинада икки баробар кўпроқ бўлди - 6 га 3. 

Айни пайтда WTA рейтингида 108-ўринни эгаллаб турган ҳамюртимиз эртага асосий тўрнинг 1/64 финалида дунёнинг 89-ракеткаси, россиялик 19 ёшли Алина Корнеевага қарши кортга чиқади. Камилла Раҳимова эса бугун илк даврада америкалик машҳур теннисчи Винус Уильямс билан ҳисоб-китоб қилади.