Чагаевнинг сўнгги рақиби Лукас Браундан нокаут!

Австралиялик Браун Янги Зеландияда ташкил этилган бокс оқшомида 36 ёшли мезбон боксчи Пати Пати “Жуниор Пати” Туага қарши рингга кўтарилди. Пати таниқли боксчи Дэвид Туанинг жияни ҳисобланади. 

Жангнинг бешинчи раундида Лукас Браун рақибини нокаутга учратди. Ўтказиб юборилган аниқ ва кучли зарбадан сўнг Жуниор Пати ўрнидан туришга ўзида куч топа олмади. 

Таъкидлаш жоиз, Браун ушбу жангда ўз фаолиятидаги энг енгил - 110,5 кг вазн оғирлик билан рингга чиқди. Шу йилнинг март ойида Диллиан Уайтга қарши жанг ўтказганида Лукас 119,5 кг тош босганди. Ўша жангда Браун фаолиятидаги илк мағлубиятни қабул қилиб олган эди. 

Эслатиб ўтамиз, ҳамюртимиз собиқ WBA чемпиони Руслан Чагаев фаолиятидаги сўнгги жангини айнан Лукас Браунга қарши ўтказган эди. Грознийда ўтган жангнинг 10-раундида Руслан техник нокаут эвазига ютқазганди.