Циципас Монте-Карло "Мастерс"да чемпионлик унвонини ҳимоя қилди

Финалда жаҳоннинг бешинчи ракеткаси, грециялик Стефанос Циципас АТР рейтингида 46-ўринни эгаллаб турган испаниялик Алехандро Давидович Фокинага қарши кортга чиқди. Бир соату 37 дақиқа давом этган учрашувда мусобақанинг амалдаги чемпиони Циципас рақибинини 6/3, 7/6 ҳисобида мағлуб этиб, яна бир бор ушбу турнир чемпионига айланди. 

Алехандро Фокина эса ҳеч ким кутмаган ҳолатда финалга қадар етиб кела олди. Ёдинизда бўлса, теннисчи илк давра учрашувида сайёрамизнинг биринчи ракеткаси Новак Жоковични мусобақадан чиқариб юборган эди. 

Ўйин давомида 23 ёшли Циципас учта эйс зарбасини амалга ошириб, тўпни ўйинга киритишда бир марта хатога йўл қўйди ва тўртта брейк-пойнт қайд этди, 22 ёшли Фокина эса бир марта эйс амалга ошириб, битта қўш хатога йўл қўйди ва учта брейк қайд этди. Теннисчиларнинг ўзаро учрашувларида ҳисоб грециялик теннисчи фойдасига 3:0 кўринишига келди.

Монте-Карлодаги муваффақиятли иштирок Циципасга 1000 рейтинг очкоси ҳамда 836 335 евро мукофот пули тақдим этди.