Конте АПЛга қайтмоқчи — у ўз номзодини "Манчестер Юнайтед"га таклиф қилди

Италиялик мутахассис манкунианликлар раҳбариятига ўз номзодини таклиф қилиш учун аллақачон аниқ қадамларни ташлаган.

“Foot Mercato” нашрининг хабар беришича, 57 ёшли мураббий машҳур исроиллик футбол агенти Пини Захавига ёрдам сўраб мурожаат қилган. Агар клуб ҳозирги бош мураббий Майкл Каррик билан хайрлашишга қарор қилса, Конте “қизил иблислар” бошқарувини қўлга олишга умид қилмоқда.

Аввалроқ Европа матбуотида “Манчестер Юнайтед” хўжайинлари жамоанинг жорий натижалари ва ўйиндаги инқироздан ўта норози экани ҳақида бир неча бор маълумотлар тарқалган эди. Жамоанинг Англия чемпионатидаги ғалабасиз серияси саккизта ўйинга етган бўлиб, Каррикни истеъфога чиқариш масаласи клуб раҳбариятининг Монакода бўлиб ўтадиган навбатдан ташқари йиғилишидаги асосий мавзуга айланиши кутилмоқда.

Эслатиб ўтамиз, Антонио Конте жорий йилнинг июнь ойида “Наполи”ни тарк этганидан буён ишсиз юрибди.