01 июн 08:34
Янгиликлар

Бокс/ММА

Деонтей Уайлдер биринчи оғир вазнда ҳам чемпион бўлмоқчи

Супероғир вазн тоифасида WBC йўналиши чемпиони Деонтей Уайлдер биринчи оғир вазнда ҳам чемпион бўлиш ҳақида ўйламоқда.

У ўзининг Instagram тармоғидаги саҳифасида бу орзуси ҳақида видео мурожаат қолдирди.

“Супероғир вазн тоифасидаги барча чемпионлик камарларини қўлга киритганимдан сўнг биринчи оғир вазнда ўзимни синаб кўрмоқчиман. Нафақат синамоқчиман, балки чемпионлик жанги ўтказаман. Шу кунгача ҳеч бир боксчига бу ишни амалга ошириш насиб қилмаган. Ҳар икки вазнда ҳам чемпионлик камарларидан воз кечмайман”, — деди Уайлдер.

Таъкидлаш жоиз, Деонтей Уайлдер ҳаваскор боксчилик фаолиятида айнан биринчи оғир вазн тоифасида ўз жангларини ўтказган. Профессионал боксдаги дебют жангида унинг вазни 94 кг бўлган. Луис Ортисга қарши ўтказган сўнгги жангида эса 97,4 кг тош босган. Биринчи оғир вазнда жанг қилиши учун вазни кўпи билан 90,7 кг бўлиши шарт.