14 ноя 10:11
Янгиликлар

Теннис

Дэвис Кубоги. Ҳар икки финалчининг таркиби маълум

Теннис бўйича эркаклар терма жамоалари ўртасидаги норасмий жаҳон чемпионати ҳисобланган Дэвис Кубоги финали иштирокчилари ўз таркибларини эълон қилишди.

Бу йилги финал баҳси 23-25 ноябрь кунлари Франциянинг Лилль шаҳрида бўлиб ўтади. Айнан шаҳар номи билан аталувчи клуб стадионида ўтказилувчи финалда Франция ва Хорватия терма жамоалари ўзаро тўқнаш келишади.

Мезбонлар таркибидан - Люка Пуйе, Жереми Шарди, Жо-Вилфрид Тсонга, Николя Маю ва Пьер-Юге Эрбер жой олишди. Бу теннисчиларнинг ҳеч бири айни пайтда хатто Топ-30 ракетка усталари сафидан жой олмаган.

Хорватия терма жамоаси эса Францияга Марин Чилич, Борна Чорич, Франко Скугор, Мате Павич ва Иван Додиг билан боради. Хорватларнинг таркиби Францияникига қараганда кучлироқ кўриняпти. Лекин фарангларда мухлислар фактори бор.