Диёрада олтин, Ситада бронза. Ўзбекистон нечанчи ўринда? (ФОТО)

Қувонарлиси, бугунги беллашувлар Ўзбекистон терма жамоаси учун омадли келди. -52 кг вазн тоифасида юртимиз шарафини ҳимоя қилган Диёра Келдиёрова финалда мўғулистонлик Сосорбарам Лҳагвасуренни мағлубиятга учратиб, Боку "Катта Дубулға" турнири олтин медали ҳамда қимматли 1000 рейтинг очкосини қўлга киритди.  

Диёра 1/2 финалда Олимпия ўйинлари совриндори, италиялик Одетте Гюффридани қўшимча дақиқалардаги вазари баҳоси эвазига мағлубиятга учратган эди. Бугунги 1000 рейтинг очкосининг тенг ярми Париж-2024 Олимпиадаси учун қўшилади. 

Ушбу вазндаги иккинчи дзюдочимиз Сита Кадамбаева эса польшалик Александра Калетани иппон баҳоси эвазига мағлубиятга учратиб, Боку "Катта Дубулға" турнирининг бронза медали ва 500 рейтинг очкосини расмийлаштирди. 

Афсуски, -60 кг вазнда татамига чиққан Кемран Нуриллаев бронза медали учун кечган муросасиз беллашувда мўғулистонлик Тсогт-Очир Бямбажавга ютқазиб қўйди. Бешинчи ўрин билан кифояланган Нуриллаев 360 рейтинг очкосига эга бўлди. 

Шу тариқа, Ўзбекистон терма жамоаси биринчи кунги баҳслар якунига кўра 1 та олтин, 1 та бронза медали билан 61 давлат орасида 2-ўринни эгаллаб турибди. Биздан битта кўп бронза медали жамғарган Озарбайжон терма жамоаси пешқадамликни ўз қўлига олди. 

Биринчи кунги беллашувларда Франция, Молдова ва Канада терма жамоалари 1 тадан олтин медални қўлга киритишди.