Достон Бозоров ёки Фазлиддин Мадраҳимов? Olamsport.com журналистлари Octagon 72 марказий жангига тахмин билдиришди

Мусобақанинг марказий беллашувида енгил вазн тоифасининг ўзбекистонлик чемпиони Достон Бозоров ўз камарини Тожикистон вакили Фазлиддин Мадраҳимовдан ҳимоя қилишга уриниб кўради. 

Olamsport.com журналистлари ушбу жанг ҳақида ўз фикрлари билан ўртоқлашишди.

Камолиддин Алимов (Olamsport.com бош муҳаррири):

"Рақобатбардош жанг бўлади. Достон Бозоров ўз мухлислари олдида жанг ўтказади. Унда имкониятларни 55% га 45 %, деб баҳолайман. Фазлиддин ҳам тажрибали. Ҳар доим чемпионга қийин бўлади. Айниқса, ўзини мухлислари кўз ўнгида. Тахминим Достон Бозоровнинг ғалабаси".

Азиз Тўхтамуродов (Olamsport.com муҳаррири): 

"Достон Бозоров иштирокидаги жанг мазкур турнирдаги энг қизиқарли баҳслардан бири бўлишига ишонаман. Тожикистон шарафини ҳимоя қилувчи Фазлиддин Мадраҳимов ҳам ўзбекистонлик ММА мухлисларига яхши таниш. Ном жиҳатдан ўзига жалб қилувчи қарама-қаршилик. Спортчиларнинг хар иккиси ҳам тажрибали. Достон мазкур вазн тоифаси чемпиони. Демак, рақиб ўзига берилган имкониятдан максимал тарзда фойдаланишга ва камарни тортиб олишга уринади. Тахмин: Тўлиқ жанг ва Бозоровнинг ғалабаси".

Cарвиноз Рахмонқулова (Olamsport.com журналисти):

"Мадраҳимов Бозоровни карьерасидаги энг ҳавфли рақиб, дейишимиз мумкин. Тик турган ҳолда жанг қилишса, имкониятлар тенг. Партерда кўпроқ Достон назорат ўрнатади, деб ўйлайман. Ҳар икки жангчига қийин бўлади. Каримни йўқотадиган нарсаси йўқ. У кўпроқ таваккал қилса керак ва ўша таваккал қилиш жараёнида ҳамюртимиз уни хато қилишга мажбур қила олади. Бозоров ақлли жангчи ва яхши тайёргарлик кўрди. Уни олдида камарини ҳимоя қилиш, UFC'га ўтиш ва Муҳиддин Мамажонов учун ҳам реванш олишдек муҳим топшириқ турибди. Умид қиламанки, Мамажонов — Мадраҳимовнинг дастлабки жангидаги каби кўнгилсизликлар бўлмайди. Вакилимиз жангни ҳакамлар қарорига қолдирса катта хато бўлади. Баҳс тўлиқ давом этмайди, камар Тошкентда қолади".

Диёрбек Мавлонов (Olamsport.com журналисти):

"Билол ва Маддалена ўртасидаги жангга билдирган тахминим тўғри чиққанди:) Достон ўзбекистонлик ММА жангчилари орасида кам сонли ҳар томонлама имкониятлари яхши, айниқса, кардиоси кучли жангчилардан. Сўнгги бор мен бундай фазилатни Бобур Қурбоновда кўргандим. Яъни, баъзи жангчиларимиз бор биринчи раунднинг ўзида бор кучини ишлатиб, учинчи раунддаги сустлик туфайли мағлуб бўладиган. Бозоровда эса бундай эмас ёки ҳозирча у етарлича кучли рақиб билан дуч келмади. Фазлиддин Мадраҳимов эса айнан тўлиқ давом этган жангларда нима қилганини кўрдик. Бу жангга тахмин билдириш жуда қийин. Аммо катта эҳтимол билан титул баҳси тўлиқ, 5 раунд давом этса керак. Унда Достон Бозоровнинг ғалабасини кутаман ва унга мухлислик қиламан".