Дзюдо. Ҳикматиллоҳ Тўраев "Мастерс" совриндори бўлди, бугун уч спортчимиз медаль учун курашади

-73 кг вазн тоифасида ҳамюртимиз Ҳикматиллоҳ Тўраев бронза медали учун баҳс олиб борди.

Канадалик Энтони Бушарга қарши баҳсда ҳамюртимиз вазари баҳоси билан устун келди ва дзюдо бўйича терма жамоамизнинг мавсумдаги илк медалини тақдим қилди. Таъкидлаш жоиз, бу Ҳикматиллоҳ учун фаолиятидаги “Мастерс” мусобақаларидаги илк медалдир. Сурхондарёлик полвонимиз шу билан бирга Токио-2020 Олимпиада рейтинги учун 900 очкони ҳам ўз ҳисобига қўшиб қўймоқда. Бугун мусобақада иштирок этган вакилларимиз ўз ҳисобларига қуйидаги рейтинг очколарини қўшиб қўйишди:

-73 кг: Ҳикматиллоҳ Тўраев – 900
-81 кг: Шарофиддин Болтабоев – 468
-81 кг: Камолиддин Расулов – 200
-70 кг: Гулноза Матниязова – 200

Бугун кун давомида 2020 йил мамлакатимизнинг Энг яхши спортчиси номини қўлга киритган Давлат Бобонов (-90 кг), Муҳаммадкарим Хуррамов (-100 кг) ҳамда Бекмурод Олтибоевнинг (+100 кг) иштирокига гувоҳ бўламиз. Вакилларимиз мусобақани қуйидаги рақибларига қарши бошлашади:

-90 кг: Давлат Бобонов – Хатам Абдулқаҳҳор (Миср)
-100 кг: Муҳаммадкарим Хуррамов – Кайхан Ўзчичек-Такаги (Австралия)
+100 кг: Бекмурод Олтибоев – Левани Матиашвили (Грузия)