Дзюдо. Ислом Каримов хотирасига бағишланган турнир ўтказилди

Шу куни хусусан, Тошкент вилояти Чирчиқ шаҳридаги “Ҳайдар Мақсудов” номли маҳалла фуқаролар йиғини ҳамда Чирчиқ шаҳар ҳокимлигининг биринчи сектори ҳудудида жойлашган 14-умумий ўрта таълим мактабида ҳам Биринчи Президентимизнинг ёрқин хотираси учун спортнинг дзюдо тури бўйича турнир ташкил этилди. Чирчиқ шаҳар ҳокимлиги, “Адолат” СДП шаҳар кенгаши, Чирчиқ шаҳар жисмоний тарбия ва спорт бўлими, Халқ таълими бўлими, Болалар ва ўсмирлар спорт мактаби, “Ҳайдар Мақсудов” номли маҳалла фуқаролар йиғини ҳамкорлигидаги ушбу хотира турнирида эллик нафардан ортиқ ўсмирлар ўз маҳоратларини намойиш этишди. Муросасиз ўтган баҳслар якунига кўра Умиджон Эрназаров (35 кг. 21-мактаб), Амал Белясов (50 кг., 24-мактаб), Хуршид Бойматов (+60кг., Чирчиқ тиббиёт коллежи) каби спортчи-ўқувчилар фахрли биринчи ўринни қўлга киритиб, ташкилотчилар томонидан медаль, диплом ва эсдалик совғаларига эга бўлишди. Тадбирнинг очилиш ва ёпилиш маросимида сўз олган Жаҳонгир Маткаримов (Чирчиқ шаҳар ҳокимининг ёшлар сиёсати, ижтимоий ривожлантириш ва маънавий – маърифий ишлар бўйича ўринбосари),  Равшан Дастиров ( “Адолат” СДП Чирчиқ шаҳар кенгаши раиси),  Комил Норметов (Чирчиқ шаҳар Халқ таълими бўлими мудири), Улпаш Сарсенова (Чирчиқ шаҳар ХТБга қарашли 14 –умумий ўрта таълим мактаби директори) ва бошқалар Биринчи Президентимиз Ислом Каримовнинг юртимизда тинчлик ва барқарорликни сақлаш, халқимизнинг мустақил тараққиёт йўлини муносиб ҳимоя қилишдаги буюк ишлари ҳақида эътироф этишди.

Илҳом РАҲМОНОВ