Элнур Абудраимов эртадан кейин АҚШда рингга кўтарилади

АҚШнинг Калифорния штати Индио шаҳрида ўтказиладиган профессионал бокс кечаси Golden Boy промоутерлик компанияси ҳамда DAZN стриминг тизими ҳамкорлигида ташкил этиляпти. Ушбу бокс оқшомининг ҳозирча марказий жанги сифатида айнан ҳамюртимиз иштирокидаги тўқнашув кўрсатилмоқда. 

Биздаги маълумотларга қараганда, Элнур Абдураимовнинг рақиби мексикалик Леонель Морено бўлади. Морено 11 ғалаба, 1 дуранг ва 1 мағлубиятга эга. Рақибларини 9 та жангда нокаутга учратган ва ўз ўрнида ўзининг ягона мағлубиятида ҳам нокаутга учраган. Жанг вакант, яъни эгасиз бўлиб турган IBF North American камари учун кечади. 

"Бу менинг илк камар учун кечадиган жангим бўлади. Фақат ғалаба учун рингга кўтариламан. Ушбу жанг учун яхшигина тайёргарлик кўрдим. Мухлисларга ёқадиган жанг кўрсатиш учун астойдил ҳаракат қиламан", - деди Абдураимов.

Маълумот учун, Элнур Абдураимов проф рингда 9 та жанг ўтказиб, барчасида ғалаба қозонган. Саккизта жангда рақибларини муддатидан аввал таслим этган. Сўнгги жангини 8 май куни Лас-Вегас шаҳридаги машҳур "T-Mobile Arena"да кубалик Мануэль Корреага қарши ўтказиб, рақибини 8 раундга мўлжалланган жангнинг 2-раундида нокаут эвазига мағлуб этган эди.