Эртага халқнинг кайфияти Сизларга боғлиқ бўлган кун!

Янгиланган бокс терма жамоаси аъзоларидан кўпчилик бундай ижобий натижани кутмаган эди. Кўплаб чарм қўлқоп усталаримизнинг профессионал боксга ўтиб кетишларидан кейин мутахассислар Осиё чемпионатида суст қатнашишимизни башорат қилишди. Тўғри, натижа 2017 йилги Осиё чемпионатидек бўлмади. Лекин Ўзбекистон терма жамоаси энг кўп боксчи билан финалда қатнашадиган бўлди. Тўрт нафар боксчи билан Ҳиндистон иккинчи, Қозоғистон эса шунча иштирокчи билан учинчи бўлди. 

Бокс тарихига назар ташласак, илк чемпионат 1963 йили бўлиб ўтган. Қизиғи шундаки, унда ҳам бугунги каби Таиланд мезбон бўлган. Япония терма жамоаси 3 та олтин билан умумжамоа ҳисобида биринчи ўринни олган. Кейинги 4 та Осиё чемпионатида Жанубий Корея яққол пешқадам бўлиб олди. 1994 йилдан эътиборан Марказий Осиё вакиллари ҳам Осиё чемпионатида иштирок эта бошладилар. Шу кунгача Қозоғистон терма жамоаси умумжамоа ҳисобида 6 маротаба Осиёда биринчи бўлган. Ўзбекистон эса 4 маротаба! 

2017 йил Ўзбекистон Жанубий Кореянинг 52 йиллик рекордини "нокаут" қилди. 1965 йил Жанубий Корея 8 та олтин медаль билан умумжамоа ҳисобида биринчи ўринни қўлга киритган, 1987 йил Қувайтда бўлиб ўтган мусобақада улар ўз рекордларини такрорлаган эдилар. 2017 йил Ўзбекистон Олимпиада чемпионларининг ёрдамида 9 та олтин медални қўлга киритгани мухлисларнинг ёдидан чиқмаган бўлса керак. Бу рекордни янгилаш учун энди узоқ йиллар талаб этилса ажаб эмас. 

Биз эса Қозоғистон билан ўртадаги фарқни қисқартириш учун яхшигина имкониятга эга бўлиб турибмиз. Аввало, мақсад - 5 та олтин, лекин 4 тасига ҳам хафа бўлмаймиз. Бу умумжамоа ҳисобида 1-ўринни қўлга киритишимиз учун етади. Чунки 5 та жангдан 2 тасида Ҳиндистон вакилига қарши рингга кўтариламиз. Ўз-ўзидан уларни мағлубиятга учратсак торози палласи биз томонда бўлади.

Финалга қадар етиб борган боксчиларимизнинг муштлари эртага рақибларимиздан очко олиш учун ҳаракатга келишига ишонамиз. Эртага ҳакамлар томонидан очколар эълон қилингач, айнан бизнинг "қўлларимиз" баландга кўтарилишини тилаб қоламиз. Чарм қўлқоп усталаримиз ҳам Ватанга Осиё чемпионлари сифатида қайтиш учун бор имкониятларини ишга солишади деган умиддамиз. Барча боксчиларни ҳурмат қилган ҳолда, эртага Бобо Усмон Батуровдан нафақат олтин, балки ёрқин жанг ҳам кутаман. Бу боксчини Бокуда бўлиб ўтган Ислом бирдамлик ўйинларида намойиш этган жангларини унута олмасам керак. Қизларимиз ҳам чакки қатнашмадилар, уларга бугун бироз омад етишмади.

Қисқаси, Нодир, Миразизбек, Бобо Усмон, Санжар ва Баҳодир, эртанги кун кайфияти Сизларга боғлиқ, бу эса "муштингиздан" келади, биз бунга ишонамиз!

Нодирхўжа Юлдашев