Эшитдик-да... Шквириндан бўшаши ҳақида ариза талаб қилишди

Жамоанинг натижа томондан оқсаётганлиги ҳомийлик қилаётган ОКМК раҳбариятини ранжитган кўринади. Ўйиндан сўнг ОКМК иқтисодиёт ва молия ишлари бўйича директори “Олмалиқ” клуб бош директорига  телефон қилиб раҳбарият ва мураббийлар ишдан бўшашлик ҳақида ариза ёзишларини сўраган. Бироз тушунарсиз ҳолат. Футбол клубида бу каби ўзгаришлар одатда клуб Президенти томонидан амалга оширилади. “Олмалиқ”да Александр Фарманов клуб президенти ҳисобланади. “Ўзбекистон қаҳрамони” унвони соҳиби бўлган бу инсон футболимиз ривожи учун ҳар доим бошқаларга ўрнак бўлган раҳбарлардан бири ҳисобланади. Олмалиқ шаҳрида нафақат футбол, балки бошқа спорт турлари ҳам фаолият олиб бормоқда. “Олмалиқ” жамоаси ўтган давр ичида республикада ўз ўрни ва нуфузини топиб бораётган ёш жамоалардан биридир. Афсуски, бу йил жамоага нимадир бўлган кўринади. Кўп минг сонли мухлисларига эга жамоанинг келажаги нима бўлади? Умид қиламизки, бу жамоа фаолияти яхшиланиб чемпионатимизда ижобий натижаларга эришади.

PS: “Олмалиқ” жамоаси иккинчи даврада ўз майдонида ўтаётган учрашувларга ҳам Тошкентдан қатнаётганлигидан хабардормиз. Шунингдек, бир қатор футболчилар олдида клуб қарздорлиги борлигини ҳам эшитдик... Нима бўлганда ҳам олий лигада мунтазам иштирок этиб келаётган жамоада вазият ижобий томонга ўзгаришига ишонамиз. Акс ҳолда жамоани кейинги йил қуйи лигада кўришимиз мумкин бўлади.