Игорь Сергеев терма жамоа машғулотлари ҳақида: "Жисмоний жиҳатдан юқори юкламалар бериляпти"

- Терма жамоанинг тайёргарликни бошлаганига бир неча кун бўлди, жаҳон чемпионати стартига эса жуда оз вақт қолди. Кайфиятингиз ва жисмоний ҳолатингиз қандай?

- Ҳозир бизга жисмоний жиҳатдан жуда жиддий юкламалар бериляпти, шу сабабли барча йигитлар яхши спорт формасида. Албатта, футболчилар бундай югуриш ва кучга доир машқларни унчалик ёқтиришмайди, лекин бу зарурат. Айни пайтда мураббийлар штаби айнан жисмоний ҳолатга катта урғу бермоқда.

- Канада ва Нидерландия терма жамоаларига қарши бўлажак ўртоқлик ўйинлари ҳақида нималар дейсиз?

- Бундай юқори савиядаги рақиблар билан спарринг ўтказиш имкониятимиз борлиги ажойиб. Айнан жаҳон биринчилиги олдидан ўз кучимизни синаб оламиз. Мундиалдан олдин яхши репетиция бўлади. Юқори савияни бевосита жаҳон чемпионатида эмас, аввалроқ ўртоқлик учрашувларида ҳис қилиб, бўлажак рақибларимизнинг ўйинини кўриб оламиз.

- Сиз икки ойдан бери ўйин амалиётисизсиз. Ҳозирги спорт формангиз қай даражада? Йиғин стартига қадар қўшимча машғулот олиб бордингизми?

-Ҳа, расмий йиғинлар бошланишидан олдин мураббийлар билан якка тартибда шуғулланган эдик ва очиғини айтсам, бизга анча жиддий юклама беришди. Жисмоний тайёргарлик машғулотлари ва ҳақиқий ўйин амалиёти бутунлай бошқа-бошқа нарсалар эканини жуда яхши тушунаман, лекин пойдевор мустаҳкам қўйилган, буни ўзимизда ҳис қилдик.

Жисмоний иш энди терма жамоада давом этмоқда. Қолаверса, ушбу йиғинларда маҳаллий клублар билан ўртоқлик ўйинлари орқали ўйин амалиётини тиклаб борамиз. “Сурхон” билан ўйнаб бўлдик, кейинги ўйинни “Нефтчи”га қарши ўтказамиз. Кейин, тахминан 22-санада, ўзаро икки томонлама ўйин ўтказиш ҳам режалаштирилган, аммо бу спарринг ҳозирча расман тасдиқланмаган. Айнан шундай ўйинлар орқали амалиёт етишмаслигини тўлдириб оламиз.

- Биламизки, терма жамоамиз мусобақадаги биринчи ўйинини Мексикада, аниқроғи, Мехико шаҳрида ўтказади. Бу шаҳар денгиз сатҳидан 2240 метр баландликда жойлашган, намлик ҳам юқори — 85% атрофида. Бундай жиҳатлардан хабардормисиз ва бу ўзига хос иқлим терма жамоага қанчалик тўсқинлик қилиши мумкин?

- Қайси мамлакатга борманг, ҳатто у ернинг иқлими Ўзбекистондаги билан бир хил бўлса ҳам, организм барибир иқлимга мослашиш жараёнини бошдан кечиради. Қаерга учиб борманг, қўшни Қозоғистон, хоҳ Россия бўлсин, дарҳол ўйинга юз фоиз киришиб кетолмайсиз. Бошида организмга ҳар қандай ҳолатда ҳам қийин бўлади.

Манзилга қанчалик эртароқ бориб, қанчалик тез мослашсак, ўйин шунчалик яхши кечади. Шу сабабли ҳаммаси ўйиндан неча кун олдин Мексикага етиб боришимизга ва тайёргарликнинг якуний босқичини қандай йўлга қўйишимизга боғлиқ бўлади. Қолаверса, малакали тиббий ёрдам ва витаминлар ёрдам беради.

Иқлим таъсир қилмайди, дейиш бемаънилик. Албатта, таъсир қилади, ҳатто жуда кучли — дунёнинг исталган нуқтасида шундай, фақат қаердадир бу кўпроқ, қаердадир эса камроқ сезилади. Биз аввал ҳам бундай ҳолатга дуч келганмиз, масалан, Малайзияга Уругвайга қарши ўйнаш учун борганимизда. Буларнинг барчаси майдонда шубҳасиз сезилади, лекин бир нарсани унутмаслик керак: рақиблар ҳам худди шундай иқлим шароитида бўлади, шунинг учун бу борада барча тенг.