Файзиев ва Султонов Чимкент турнири ярим финалида

Хабар берганимиздек, ушбу турнирнинг асосий тщр баҳсларида бир йўла тўққиз нафар теннисчимиз ўз иштирокини бошлаганди. Улардан икки нафари ярим финалга етиб келди.

Турнирнинг биринчи ракеткаси сифатида қайд этилган ҳамюртимиз Санжар Файзиев чорак финалда россиялик Данила Арсеновни 6:3, 6:2 ҳисобида мағлуб этди. Унинг финал остонасидаги рақиби турнирнинг 4-ракеткаси эстониялик Владимир Иванов бўлади.

Иванов чорак финалда терма жамоамизнинг яна бир аъзоси Жўрабек Каримовни 6:1, 6:4 ҳисобида таслим этди. Яна бир ёш теннисчимиз Ҳумоюн Султонов эса ҳамюртларимиздан бири Шаробиддин Абзаловга ҳеч қандай имконият қолдирмади - 6:2, 6:0.

Султонов иккинчи босқичда турнирнинг учинчи ракеткаси россиялик Виктор Балудани 7:6(5), 6:3 ҳисобида енгиб, ўзига хос шов-шув кўтарган эди. Ҳумоюн финал чиптаси учун россиялик Иван Давидовга қарши кортга чиқади.