Фазлиддин Ғоибназаровнинг рақиби ўзгарди, у россиялик боксчи

Машҳур промоутер Боб Арумга тегишли Top Rank промоутерлик компанияси мижози бўлган ҳамюртимиз 22 сентябрь куни АҚШнинг Аризона штати Тусон шаҳрида мексикалик Виктор Росасни 80:72, 80:72, 80:72 ҳисобида мағлуб этганди.

Ғоибназаров фаолиятидаги ҳисоб бўйича тўртинчи жангида 9 декабрь куни АҚШнинг Нью-Йорк шаҳридаги ўз бағрига 5 500 томошабинни сиғдира олувчи муҳташам Madison Square Garden аренасида рингга кўтарилади.

Аввалроқ, унинг рақиби мексикалик Алексис Дел Боске бўлиши ҳақида хабар берган эдик. Лекин бугун Фазлиддиннинг рақиби ўзгарди. У россиялик Андрей Климовдир. 35 ёшли бу боксчи профи рингда 23 та жанг ўтказган бўлиб, уларнинг 19 тасида ғалаба қозонган. Тўртта жангда мағлубият аламини тотиб кўрган. Тўққизта жангда рақибларини нокаутга учратган.

Эътиборлиси, Климов мағлубиятларидан 3 тасини кетма-кет охирги жангларида қабул қилиб олган. Яъни, у сўнгги 3 та жангида мағлубият аламини тотиб кўрган.

Маълумот учун, 9 декабрь кунги бокс оқшомининг марказий жанги Василий Ломаченко иштирокида ўтказилади. Украиналик 29 ёшли боксчи кубалик 36 ёшли Гильермо Ригондога қарши рингга кўтарилади. Жанг биринчи енгил вазн (59 кг) тоифасида ўтказилиб, ўртага Ломаченкога тегишли WBO чемпионлик камари қўйилади.