FIDE Freestyle Chess Жаҳон чемпионати. Абдусатторов Карлсенга, Синдаров Эргаисига қарши ўйнади

Ўз тарихида илк бор ўтказилаётган ушбу мусобақада гроссмейстерларимиз Нодирбек Абдусатторов ва Жавоҳир Синдаров ҳам иштирок этяпти. Саралаш баҳсларида кучли тўртликдан жой олиб, 1/2 финалга йўл олган Абдусатторов финал чиптаси учун норвегиялик афсона Магнус Карлсенга қарши дона сурди. Дастлабки икки партияда кучлар тенг келди. Учинчи ва тўртинчи партияларда эса Магнус ғалаба қозониб, умумий 3:1 ҳисоби билан финалга йўл олди. 

Иккинчи 1/2 финалда америкалик Фабиано Каруана германиялик Винсент Кеймердан 2,5:1,5 ҳисобида устун келди. Бугун финалда Магнус Карлсен Фабиано Каруанага қарши жаҳон чемпионлиги учун баҳс олиб боради. Нодирбек Абдусатторов эса Винсент Кеймер билан учрашувда 3-ўрин тақдирини ҳал қилади. 

Афсуски, саралаш босқичини омадсиз ўтказган Жавоҳир Синдаров 5-ўрин учун кечган учрашувда ҳиндистонлик Аржун Эргаисига 1:3 ҳисобида имкониятни бой бериб қўйди. Энди у бугун 7-ўрин учун кечадиган баҳсда америкалик Левон Аронян билан ҳисоб-китоб қилади. 

Маълумот учун, FIDE Freestyle Жаҳон чемпионати ғолиби 100 000, финалчи 60 000, учинчи ўрин соҳиби 40 000 доллар мукофот пулига эга бўлади. Тўртинчи ўрин 30 000, бешинчи ўрин 25 000, олтинчи ўрин 20 000, еттинчи ўрин 15 000, сўнгги ўрин эгаси эса 10 000 долларни қўлга киритади. Нодирбек ва Жавоҳир бугун мос равишда 40 000 ҳамда 15 000 доллар учун курашади.