Головкин Альваресни допингда айблади, текширувчиларни эса террорчи деб атади

Қозоғистонлик боксчи Калифорнияда давом этаётган машғулоти чоғида маҳаллий журналистларга интервью берди. Саволларга жавоб берар экан, Головкин Альвареснинг жамоаси била туриб допинг истеъмол қилаётганини айтди. 

“Қўйсангизчи, қанақа гўшт, - деди Головкин. - Канелонинг жамоаси таъқиқланган моддалардан фойдаланаётганини жуда яхши билади. Улар буни беркитишга ҳаракат қилишяпти. Сауль биринчи кун боксда эмас. Уни детекторда текшириб кўринглар, шунда ҳаммаси ойдинлашади. Мен илк жангимиздаёқ унинг “тоза” эмаслигини билгандим. Ўша жанг видеосини такроран томоша қилсангиз, таъқиқланган препаратларнинг шундоққина изи кўринади”.

Мексикалик боксчининг жамоаси таъқиқланган кленбутерол моддаси унинг қон таркибига гўшт орқали тушиб қолганини рўкач қилаётганди. Айни пайтда Невада Спорт комиссияси бу борада изланиш олиб боряпти. Головкин бу ташкилотни ҳам жиддий тарзда танқид остига олди. 

- Улар вазиятга юмуқ кўз билан қарашяпти. Мен жангни қайта кўриб чиқиб, фикрим қанчалик тўғри эканлигига яна бир бор иқрор бўлдим. Спорт комиссиясида ишлаётганлар одам эмас, улар спортни ўлдираётган террорчилар! Уларнинг жойи қамоқда!, -деди Головкин.