Головкиннинг World Boxing ташкилотига 6 та янги федерация қўшилди + ФОТО

World Boxing Ижроия кенгаши Чад, Конго Демократик Республикаси, Эфиопия, Либерия, Қувайт ва Яман миллий бокс федерацияларидан янги аъзолик аризасини маъқуллади.

Ижроия кенгаши томонидан маъқулланиши учун барча олтита миллий федерация аризаларни кўриб чиқишнинг қатъий тартибидан ўтди. Улар тегишли талабларга мувофиқ деб тан олинган ва ўз низомлари ҳамда ички тартиб-қоидаларига мувофиқ, раҳбар шахсларни сайлашнинг шаффоф ва очиқ жараёнини, Бутунжаҳон антидопинг агентлиги (WADA) томонидан тан олинган антидопинг сиёсати ва тартиб-қоидаларининг мавжудлиги ва амал қилишини, шунингдек, тўлиқ мустақил бўлган ёки ташқи иштирокни назарда тутувчи низоларни ҳал қилиш ва апелляция беришнинг тизимли жараёнини намойиш этишга қодир.

Аризаларнинг тасдиқланиши World Boxing`нинг Африкадаги иштирокини кенгайтиради. Ҳозирда ташкилотда унинг мусобақаларида иштирок этиш ҳуқуқига эга бўлган 184 та миллий федерация мавжуд: 122 та тўлиқ аъзо, битта ассоциацияланган аъзо ва 61 та тасдиқланган аъзо.

Илгари World Boxing`да 180 нафар аъзо бўлган, бироқ бир миллий федерациянинг аъзолиги тўхтатилган, яна бирининг аъзолиги бекор қилинган. Эквадорнинг аъзолиги эришилган келишув бажарилмагандан сўнг тўхтатилди. Тўхтатиш тўғрисидаги билдиришномани олгандан сўнг, Эквадор миллий федерацияси зарур чораларни кўрди ва сентябрь ойида Бош ассамблеяни ўтказади, бу эса вазиятни тартибга солиш имконини бериши кутилмоқда.

Камерун Миллий федерациясининг 2026 йил апрель ойида қабул қилинган аризасини маъқуллаш, аъзолик талабларига жавоб бермайдиган тақдим этилган ҳужжатларни қўшимча таҳлил қилгандан сўнг бекор қилинди. Миллий олимпия қўмитаси ва Камерун спорт вазирлиги яқин келажакда тақдим этилиши режалаштирилган янги ариза устида ҳамкорликда ишламоқда.

World Boxing Низомига кўра, олтита янги миллий федерация "маъқулланган аъзо" (Endorsed Member) мақомини олди. Бу уларга World Boxing мусобақаларида иштирок этиш имконини беради, бироқ улар ҳали "тўлиқ аъзо" (Full Member) мақомига эга бўлмаганликлари сабабли 2026 йилги Конгрессда овоз бера олмайдилар.

Тўлиқ аъзолик мақоми фақат World Boxing ташкилотининг олий бошқарув органи бўлган Конгресс томонидан берилиши мумкин. Ушбу масала 2026 йил 20 ноябрда Панамада бўлиб ўтадиган навбатдаги World Boxing конгрессида овозга қўйилади.

Аризалари ушбу Конгрессда ратификация қилинган ва тўлақонли аъзо мақомини олган тасдиқланган аъзолар 2027 йилги Конгрессда ва ундан кейинги барча конгрессларда овоз беришлари мумкин бўлади", - дейилади ташкилот хабарида.

Айни пайтда World Boxing президенти таниқли қозоғистонлик боксчи Геннадий Головкин бўлиб, у 2025 йил 23 ноябрда Римда бўлиб ўтган ташкилот конгрессида уч йил муддатга - 2028 йил ноябригача ушбу лавозимга расман сайланган эди.