Гулистонда замонавий дзюдо зали фойдаланишга топширилди ФОТОГАЛЕРЕЯ

Унда вилоят ҳокими Ғофуржон Мирзаев, Халқ таълими вазири Бахтиёр Саидов, Ўзбекистон Миллий Олимпия қўмитаси раисининиг ўринбосари – мамлакат дзюдо федерацияси раиси Азизжон Камилов иштирок этди.

"Қисқа фурсатда Ўзбекистон Республикаси Халқ таълими вазирлиги, Миллий олимпия қўмитаси ҳамда Ўзбекистон дзюдо федерацияси ҳамкорлигида сирдарёлик ёшлар учун совға ҳозирлашга ҳаракат қилдик. Ўйлайманки, Сирдарё вилоятидан, айнан шу залдан яқин йилларда Ўзбекистон терма жамоаси аъзолари етишиб чиқади. Биз яқинда Сирдарё вилояти дзюдосига янги раҳбар сайлагандик. Тўлқин Тулянович дзюдони жуда ҳам яхши кўрадилар. Ишончим комил, бу сирдарёлик дзюдочилар муваффақиятидаги биринчи омил бўлади. Ҳозир ёш дзюдочиларга қараб туриб, янги Ришод Собиров, Давлат Бобоновларни кўргандек бўляпман. Бу нарса уларнинг кўзидаги ишончда намоён бўляпти. Болалар, орзунинг ўзи камлик қилади, фақат меҳнат билан чўққига чиқишингиз мумкин. Шу нарсани ўзингизга шиор қилиб олсангиз, келажакда ота-онангиз, яқинларингиз ва энг муҳими – Ватанимизни кўкларга кўтарасиз. Президентимиз спорт билан шуғулланишингиз учун барча шароитларни муҳайё қилиб беряптилар. Фақат ишлаш қоляпти. Биз сизларга ишонамиз! Энг муҳими, ана шу ишончи сизда ҳам бўлсин", - деди А.Камилов. 

Маълумот учун, бугунги кунда Сирдарё вилоятида 600 нафарга яқин ёшлар дзюдо билан мунтазам шуғулланиб келишмоқда. Ўсмирлар орасидан 4 нафари Ўзбекистон терма жамоаси аъзоси ҳисобланади. Ушбу кўрсаткичларни янада ошириш, ёшларнинг дзюдо билан профессионал тарзда шуғулланишлари учун янги қурилган спорт залда барча имкониятлар яратилган.

Тадбирда спортчи ёшлар ўзларининг кўргазмали чиқишлари билан барчага кўтаринки кайфият улашди. Шунингдек, иштирокчиларга ташкилотчилар томонидан эсталик совғалари тақдим этилди.