14 май 08:04
Янгиликлар

Бокс/ММА

Иноуэ — Накатани жанги Головкин — "Канело" жангини чипталар савдоси бўйича ортда қолдирди

Иккинчи енгил вазнда мутлақ жаҳон чемпионлиги учун японияликлар Наоя Иноуэ ва Дзюнто Накатани ўртасидаги жанг бокс тарихидаги энг кўп даромад келтирган 5 та жанг қаторига кирди.

Иноуэ ва Накатани 2 май куни Токиодаги Tokyo Dome аренаси 55 минг томошабин кўз ўнгида жанг қилишганди. Наоя "Монстр" ушбу жангда ҳакамларнинг якдил қарори билан ғалаба қозониб, ўз камарларини муваффақиятли ҳимоя қилган эди.

Эълон қилинган маълумотларга кўра, ушбу тадбирга чипталар сотувидан тушган даромад 32 миллион долларни ташкил этган. Бу эса Наоя Иноуэ - Дзюнто Накатани жанги ушбу кўрсаткич бўйича тўртинчи ўринни эгаллаб, Геннадий Головкин ва Сауль "Канело" Альварес ўртасидаги биринчи жангни бешинчи ўринга тушириб қўйди. 2017 йил ўтказилган Альварес - Головкин жанги ташкилотчиларга Лас-Вегас кассаларидан 27,1 миллион доллар даромад келтирган эди.

Биринчи учликни Флойд Мейвезер - Мэнни Пакьяо (2015 йил, 72,2 миллион доллар), Флойд Мейвезер - Конор Макгрегор (2017 йил, 55,4 миллион доллар) ва Теренс Кроуфорд - Сауль Альварес (2025 йил, 47,2 миллион доллар) жанглари ташкил этади.