Ислам Махачев: "UFC`дан қўнғироқ кутяпман"

Ислам Махачев ўз сўзида октагонга жорий йил охири ёки келаси йил бошида қайтиш ниятида эканлигини тасдиқлади ва бўлажак рақиблари номини айтди.

"Жангдан сўнг мен учта МРТ текширувидан ўтдим ва умуртқа поғонамни тўлиқ текширтирдим. Бир нечта кичик муаммолар бор, шунинг учун ҳозир улар билан шуғулланяпман. Жиддий нарса эмас, шунчаки белимни мустаҳкамлаяпман.

UFC`дан қўнғироқ кутамиз. Ўйлайманки, Рамазонгача жанг ўтказиш энг мақбул вариант. Рамазон февраль ойида бошланади, шунинг учун унга қадар жанг қилиб олиш идеал бўларди", — деди россиялик жангчи "Матч ТВ"га берган интервьюсида.

Махачевнинг сўзларига кўра, рақиб масаласи ҳали узил-кесил ҳал қилинмаган, бироқ чемпионлик камари учун икки аниқ даъвогар бор.

"Ушбу вазн тоифасида мени ҳар куни машғулот қилишга ундайдиган ҳақиқий даъвогарлар бор. Менда камида икки жуда яхши рақиб бор: Карлос Пратес ва Майкл Моралес. Шунинг учун бўшашишга вақт йўқ", — дея қўшимча қилди UFC`нинг энг яхши жангчиси.