Исроил Мадримовнинг январь ойидаги рақиби ҳақида маълумот берилди

Бокс инсайдери Жалол Аҳмедов "The Dream" Мадримовнинг мазкур жанги ҳақида маълумот берди.

"Исроил Мадримовнинг 24 январь куни жанг қилиши борасида хабарлар тарқалган эди. Бу масалани унинг менежерларидан бири Алик Фроловдан аниқлаштирдим.

Унинг айтишича, Мадримов ростдан ҳам ушбу кечада жанг ўтказади. Бироқ рақиб жиддий бўлмайди ва бу баҳс шунчаки Мадримовнинг жарроҳлик амалиётидан сўнг қай даражада тикланганини кўриб олиш учун тест сифатида ўтказилади", деб ёзган Аҳмедов ўз Telegram каналида.

Маълумот учун, ўша куни Matchroom Boxing компанияси Лас-Вегасда бокс оқшоми ташкил этади. Кечанинг марказий жангида IBF камари соҳиби Раймонд Мураталла даъвогар Энди Крузга қарши ҳимоя жангини ўтказади.  

Эслатиб ўтамиз, 30 ёшли Исроил Мадримов проф рингда ҳозиргача 13 та жанг ўтказиб, 10 ғалаба, 2 мағлубият ва 1 та дуранг қайд этган. У охирги жангини 22 февраль куни америкалик Виржил Ортисга қарши ўтказиб, очколар ҳисобига кўра имкониятни бой берганди.