Истомин чемпионликни ҳимоя қила олмади, Кравчук янги чемпион!

Соврин жамғармаси 125 минг АҚШ долларини ташкил қилувчи турнирнинг яккалик баҳсларидаги ҳал қилувчи финал учрашувида ҳамюртимиз Денис Истомин чемпионлик унвонини ҳимоя қилишга уриниб кўрди.

Афсуски, мамлакатимизнинг биринчи ракеткаси бош мукофот учун баҳсда россиялик Константин Кравчукка 5:7, 4:6 ҳисобида имкониятни бой бериб қўйди. Бу билан Денис “Тошкент Челленжер” турнирининг 3 карра ғолиби бўлиш имкониятидан фойдалана олмади.

Бунга қайсидир маънода биринчи сетда белидан олинган кичик жароҳат ҳам сабаб бўлди. Қолаверса, Истомин кеча бир йўла 3та учрашув ўтказган эди. 31 ёшли Кравчук дунё рейтингида 102, 30 ёшли Истомин эса 125-поғонадан жой олган.