Жаҳон чемпионати қаҳрамонлари бугун юртимизга қайтади

Эслатиб ўтамиз, мусобақанинг рапид йўналиши бўйича ҳамюртимиз 17 ёшли Нодирбек Абдусатторов сайёрамизнинг энг кучли шахматчиси эканлигини исботлади.

Рапид йўналишидан сўнг, 180 нафар шахматчилар икки кун давомида блиц йўналишида ўзаро мусобақалашди. Ўтказилган баҳслар якунига кўра, Жавоҳир Синдаров ҳамюртларимиз ичида энг яхши натижани қайд этди.

Шахматчимиз 21 имкониятдан 13,5 очко жамғарган ҳолда 8-ўринни эгаллади. Шунингдек, Шамсиддин Вохидов 12,5 очко билан 40, Нодирбек Абдусатторов эса 12 очко билан 43-ўринни банд этди. Жаҳонгир Вохидов эса 11 очко билан 80-ўриндан жой олди.

1 январдан 2 январга ўтар кечаси жаҳон чемпинлигини қўлга киритган Нодирбек Абдусатторов ва бошқа шахматчиларимиз жой олган самолёт Ислом Каримов номидаги Тошкент халқаро аэропортига келиб қўнади.

Ҳамюртларимиз бир қатор спортимиз мутасаддилари, кенг жамоатчилик ва мамлакатимиздаги оммавий ахборот воситалари вакиллари томонидан кутиб олинади.

Эслатиб ўтамиз, шахмат бўйича жаҳон чемпионатида ғолибликни қўлга киритган ва мазкур спорт турининг рапид йўналишида жаҳоннинг энг ёш чемпиони сифатида эътироф этилган Нодирбек Абдусатторов Ўзбекистон Республикаси Президентининг фармони билан “Мард ўғлон” давлат мукофоти билан тақдирланди ҳамда Президентимиз кўрсатмаси билан унга Тошкент шаҳрида 2 хонали хонадон совға қилинади.