Камончиларимиз тарихда илк бор микст дастурида Осиё чемпионати совриндорига айланишди

"Бангладешнинг Дакка шаҳрида бўлиб ўтган 24-Осиё чемпионатида юртимиз камончилари тарихий ютуққа эришиб, юқори профессионаллик, матонат ва ғалабага бўлган қатъиятини ёрқин намоён этдилар.

Аралаш жуфтлик баҳсларида Париж Олимпиадаси иштирокчилари — Амирхон Содиқов ва Зиёда Абдусатторова ажойиб натижа қайд этдилар. Улар кескин кечган ярим финалда амалдаги Париж-2024 Олимпия чемпионлари — Жанубий Корея жамоасини мағлуб этиб, Ўзбекистон камондан отиш тарихида мислсиз саҳифани очдилар. Бу ғалаба жамоамизнинг дунёнинг етакчи терма жамоалари билан тенгма-тенг беллаша олишини исботлади.

Финал баҳсида эса Ўзбекистон дуэти Хитой Тайпейи терма жамоаси билан куч синашиб, 6:2 ҳисобида имкониятни бой берди. Шунга қарамай, улар мамлакатимиз тарихида илк бор аралаш жуфтлик йўналишида Осиё чемпионатининг кумуш медалига сазовор бўлдилар.

Мусобақанинг яна бир тарихий онлари эркаклар терма жамоасига насиб этди — улар илк бор бронза медалини қўлга киритдилар. Учинчи ўрин учун кечган баҳсда вакилларимиз қатъият ва ишонч билан Қозоғистон жамоасини мағлуб этдилар", дейилади федерация хабарида.