Контавейт Симона Халепни ватанида мағлуб этди ва бош совринга эга чиқди

Ҳал қилувчи финал учрашувида дунёнинг 14-ракеткаси бўлиб турган эстониялик Анетт Контавейт мезбонлар вакиласи, WTA рейтингида 18-поғонада бораётган Симона Халепни ортиқча қийинчиликсиз мағлуб эта олди - 6/2, 6/3.

Бир соату 11 дақиқа давом этган учрашувда Анетт 2 та эйс ва 5 та брейкни амалга оширди. Симонада эса эйслар сони 3 та, брейк-пойнтлар сони 2 тани ташкил этди. Теннисчиларнинг ўзаро учрашувларида Анетт илк бор Халепдан устун келди - 3:1. 

Клуждаги соврин Контавейт учун мавсумдаги тўртинчи, фаолиятидаги бешинчиси бўлди. Бир ҳафталик меҳнат унга 29,200 доллар ҳамда 280 рейтинг очкосини тақдим этди. Халеп эса ўз ватанидаги Transylvania Open турниридан 16,398 доллар ва 180 очко ишлаб олди.