Кураш фахрийларига эҳтиром кўрсатилди

Бу ҳақда пойтахтимиздаги “Citi Palase” меҳмонхонасида Ўзбекистон кураш фахрийлари кенгашининг биринчи таъсис конференцияси ва унинг доирасида ўтган “Уч авлод учрашуви”да мамлакат кураш федерацияси раисининг биринчи ўринбосари, замонавий кураш қонун-қоидалари муаллифи Комил Юсупов таъкидлади.

Ҳақиқатан шундай. Ота-боболаримиздан мерос курашнинг спорт тури сифатида қад ростлашида, не-не даврлар силсиласидан омон ўтиб, бугунги кунларга етиб келишида халқ ўртасида катта обрўга эга бўлган фахрий полвонларнинг меҳнатлари эътиборга муносиб.

Конференция давомида шу ҳақда сўз борди. Нуронийларнинг билим ва бой ҳаётий тажрибасидан ёшлар маънавиятини юксалтириш, уларда ватанпарварлик руҳини мустаҳкамлашда самарали фойдаланиш бугунги куннинг муҳим омилларидан бири эканлиги эътироф этилди.

Қорақалпоғистон Республикаси, Тошкент шаҳар ва барча вилоятлардан фахрий курашчилар, отахон полвон боболар, мутасадди ташкилот вакиллари иштирок этган конференцияда 13 кишидан иборат Ўзбекистон кураш фахрийлари кенгаши тузилди, унинг аъзолари сайланди.

Қизғин мулоқот тарзда ўтган суҳбат давомида миллий спортимизнинг тирик афсонаси бўлган отахонлар, фахрий полвонлар ўз давридаги курашлар, полвонлар, халқ ўйини бўлган курашнинг замонавий спорт тури бўлиши, қонун-қоидалари яратилиши, халқаро спорт мақомига кўтарилиши ҳақида сўзлаб беришди. 

Курашнинг жаҳон спортига айланиши, бу йўлда амалга оширилган ишларнинг тарихий аҳамият касб этишини билдириб, давлатимизнинг халқаро спорт оламидаги эътибори, юртимизда оммавий спортни ривожлантириш борасидаги ишлар кўламига юқори баҳо беришди.

Тадбир якунида Ўзбекистон кураш федерацияси томонидан фахрий полвонлар махсус сертификат ва гувоҳномалар билан тақдирланди.