Кураш: Германияда Президент соврини учун халқаро турнир ўтказилади

Қабул қилинган дастурлар асосида хорижий давлатларда Ўзбекистон Республикаси Президенти соврини учун кураш бўйича халқаро турнирларнинг тизимли ўтказилишига эришиш борасида Ўзбекистон кураш федерацияси томонидан ташаббуслар амалга оширилаяпти. 

Ушбу саъй-ҳаракатлар натижасида жорий йил 7-9 май кунлари Германиядаги Франкфурт-Майн шаҳрида Ўзбекистон Республикаси Президенти соврини учун халқаро турнир ўтказилади. Бу ҳақда Ўзбекистон кураш федерацияси маълум қилди. 

Мукофот жамғармаси 10 минг евро бўлган мазкур турнир курашни оммалаштириш орқали Ўзбекистоннинг халқаро нуфузини оширишда муҳим омил саналади. Кўҳна қитъада ўтадиган мусобақада 20 га яқин давлатлардан маҳоратли спортчилар иштирок этиш учун дастлабки талабномаларни ташкилий қўмитага тақдим этган. 

Илк бор ташкил этилаётган мусобақаларда эркаклар +81 кг вазн тоифасида, аёллар +63 кг.да кураш олиб боришади.  

Халқаро кураш ассоциацияси, Европа кураш конфедерацияси, Ўзбекистон ва Германия кураш федерациялари ҳамда мамлакатимизнинг Германиядаги элчихонаси ҳамкорлигида ўтадиган нуфузли турнир доирасида Германиядаги бир қатор спорт клубларида, маданий масканларда 3 кун мобайнида миллий спортимиз бўйича мураббийлар семинари, давра суҳбатлари, миллий қадриятларимизга оид кўргазмалар ташкил этилиши режалаштирилган. 

Т.Рўзиев