Кураш. Паҳлавон Маҳмуд хотирасига бағишланган мусобақага тайёргарлик кўрилмоқда

29 июнь - 1 июль кунлари “Ичан-қалъа” мажмуасидаги “Кўҳна Арк” мадрасасининг олд майдонида кураш бўйича Паҳлавон Маҳмуд хотирасига бағишланган I халқаро турнир бўлиб ўтади.
Дунёнинг ўнта мамлакати: Қозоғистон, Хитой Тайпейи, Туркманистон, Ҳиндистон, Эрон, Жанубий Корея, Қирғизистон, Тожикистон, Германия,   Франция ва бошқалардан ташриф буюрган 113 нафар иштирокчи еттита вазн тоифасида медаллар учун баҳс олиб борадилар. Улар орасида ўзбекистонлик 58 спортчи (24 нафари аёллар) ҳам гиламга чиқади.

Чет эллик иштирокчилар 27 июндан мамлакатимизга учиб келишмоқда. Улар Тошкент шаҳридаги “City Palace” меҳмонхонасига жойлаштирилди ва пойтахтимизнинг диққатга сазовор жойлари билан танишиш имконига эга бўлишди.
28 июнь куни Урганч халқаро аэропортида мусобақа иштирокчилари тантанали равишда кутиб олинди.

Халқаро турнирнинг очилиши маросими 2018 йил 29 июнь куни соат 16.00да “Кўҳна Арк” мадрасасининг олд майдонида бошланади.