Курашчи ва гимнастикачиларимиз Осиё ўйинларига қай тарзда тайёрланишмоқда? ФОТО

Ўзбекистон спорт делегацияси ушбу нуфузли турнирда ўз олдига катта мақсадлар қўймоқда. Терма жамоаларимизнинг Осиё ўйинларига муносиб тайёрланишлари учун Миллий олимпия қўмитаси томонидан ўқув-машғулот йиғинлари ташкил этиб берилган.Бугун МОҚ ишчи гуруҳи спортчиларимизнинг ўйинларга қай тарзда тайёргарлик кўраётганликларини кузатиш учун машғулотларга ташриф буюрди.

«Динамо» спорт жамиятига қарашли машғулотлар залида спорт курашлари бўйича терма жамоамиз аъзолари қизғин машғулот олиб бормоқдалар. Маълумки, яқинлашиб келаётган ўйинларда спорт курашлари (эркин, юнон-рум ва аёллар кураши)дан ҳам кўплаб медаллар кутилмоқда. Полвонларимиз ана шуни ҳис қилган ҳолда машғулотларда астойдил тер тўкишмоқда.


«Юнон-рум курашчиларимиз Осиё ўйинларида муваффақиятли иштирок этишни мақсад қилиб қўйганлар. Бу йўлда машғулотлар қизғин давом этмоқда. Осиё ўйинларигача июль ойида Грузия ва Туркияда бўлиб ўтадиган Гран-При мусобақаларида иштирок этамиз. Индонезия сафари олдидан тайёргарликнинг сўнгги босқичи Янгиобод базасида ташкил этилади», – деди юнон-рум кураши бўйича терма жамоа мураббийи Равшан Рўзиқулов.


Шундан сўнг Ўзбекистон гимнастика федерациясига қарашли «Универсал» спорт мажмуасида давом этаётган машғулотлар бориб кўрилди. У ерда ҳам бадиий гимнастика, трамполин, спорт гимнастикаси терма жамоалари Осиё ўйинларига тайёргарликни давом эттирмоқдалар. Машғулотлар режага биноан кунига икки мартадан ўтказилмоқда. Гимнастикачиларимиз ҳам Осиё ўйинларида, шунингдек, Буэнос-Айресда ўтказиладиган III ёзги ўсмирлар Олимпия ўйинларига тайёрланишмоқда. Бадиий гимнастикачиларимиз анъанага кўра Осиё ўйинларида терма жамоамиз учун медаллар шодасини тақдим этишни режалаштириб қўйишган.