Лиондаги теннис турнирида чемпион аниқланди

Ҳал қилувчи финал учрашувида дунёнинг 64-ракеткаси бўлиб турган хитойлик Чжан Шуай WTA рейтингида 140-поғонадан жой олган украиналик Даяна Ястремскаяга қарши кортга чиқди. Бир соату 48 дақиқа давом этган баҳсда 33 ёшли Чин юрти вакиласи 3/6, 6/3, 6/4 ҳисобида зафар қучди.

Чжан учрашув давомида 2 та, Даяна эса 6 та эйс зарбасини амалга оширган. Теннисчиларнинг ўзаро учрашувларида Шуай ҳисобда олдинга чиқиб олди - 2:1. Open 6e Sens Métropole de Lyon турниридаги муваффақиятли иштирок Чжанга 280 рейтинг очкоси ҳамда 34,677 евро мукофот пули келтирди. Ястремская бир ҳафталик меҳнатидан 180 балл ва 17,258 евро ишлаб олди.