Мафтункор Эжени Бушар фаолиятидаги сўнгги учрашувини ўтказди

Канаданинг Монреаль шаҳрида ўтказилаётган WTA 1000 тоифасига кирувчи турнир канадалик теннис маликаси учун фаолиятидаги сўнгги мусобақа бўлиб қолди. 31 ёшли Бушар ушбу турнирнинг иккинчи даврасида швейцариялик Белинда Бенчичга 2/6, 6/3, 4/6 ҳисобида имкониятни бой бериб қўйди. 

"Мен шу кортларда катта бўлдим. Болалигимда бу ерда ўтказилган ўйинларни томоша қилдим. Ўзим ҳавас қилган жойда фаолиятимни якунлаш ҳам оғир, ҳам мароқли. Теннис менга ўзим хоҳлагандан ҳам кўп нарсани берди. Ўтган йиллар давомида ёнимда бўлган, мени ҳар томонлама қўллаб-қувватлаган инсонларга чексиз миннатдорлигимни изҳор қиламан. Онам, отам, акам, опа-сингилларимга раҳмат. Сизларсиз мен ҳозир бу ерда бўлмасдим", - дея кўзида ёш билан учрашувдан сўнг кортда интервью берган Эжени.

Маълумот учун, Эжени Бушар Уимблдон-2014 вице-чемпиони ҳисобланади. Ўша йили у  "Катта Дубулға" туркумига кирувчи Australian Open ва "Ролан Гаррос" турнирлари 1/2 финалига қадар етиб борган. 2023 йилда Канада терма жамоаси билан Билли Жин Кинг Кубогини қўлга киритган. Нюрнберг WTA 250 турнири чемпиони бўлган. Саккиз маротаба WTA турнирларида финалига қадар етиб борган.