Москвада AIBA Конгресси бошланди, Ғофур Раҳимов ҳисобот берди

Конгресснинг биринчи кунида ташкилотнинг бугунги кундаги вақтинчалик президенти вазифасини бажараётган ҳамюртимиз Ғофур Раҳимов сўзга чиқди ва амалга оширилган ишлар бўйича ҳисобот берди.

Ғофур Раҳимов ўз чиқишида турли масалалар ҳақида гапирди. Жумладан, ташкилотга раҳбар сифатида етиб келганида AIBA қарзлари 40 миллион доллардан ортиқ эди. У қисқа вақт ичида ушбу қарзлардан қутулганлигини, бугунги кунга келиб эса AIBA тўғри йўлга тушиб олгани ҳақида гапирди.

Шунингдек, Раҳимов аёллар боксини ривожлантириш ҳақида ҳам гапириб ўтди. Қолаверса, бугунги кунда хавф солиб турган энг катта муаммо - боксни Олимпия ўйинлари дастуридан чиқиб кетишига йўл қўймаслигини ҳам маълум қилди. Бокс дастлабки Олимпия ўйинларидан буён давом этиб келаётгани, бундан кейин ҳам Олимпия оиласида қолишини таъкидлаб ўтди.

Конгресс ўз ишини давом эттирмоқда. Президентлик сайловлари эртага ўтказилади.

Камолиддин Алимов, Москва.

Суратлар муаллифи: Маъруфжон Асқаров.