Нодиржон Мирзаҳмедов: "Санжар Ташкенбайнинг жаҳон чемпиони эканлиги мени чўчитаётгани йўқ"

Olamsport.com сайти ушбу жанг олдидан боксчимизга бир неча савол билан мурожаат қилди.

- Нодирбек, оз вақт қолганида жангга рози бўлдингиз. Бу таклиф қай тарзда бўлди?

- Бу таклиф Халқаро бокс ассоциацияси - IBAдан бўлди. Россия томондан таклиф билдирилди ва биз рози бўлдик.

- Турнир кардини кўрдик ва у ерда ўзбек боксчилари ичида фақат сиз борсиз. Бошқа юртдошларимизга таклифлар бўлмадими? 

- Йўқ, 15 декабрь куни Астанада ўтказиладиган жанг оқшомида ўзбекистонлик боксчилардан фақат мен рингга кўтариламан.

- Санжар Ташкенбай жиддий рақиб. Унга қарши олдин ҳам жанг ўтказганмисиз?

- У билан аввал ҳам жанг ўтказганман. Бир маротаба. Ўтган йили Қозоғистонда ўтказилган халқаро турнирда биз ўзаро тўқнаш келганмиз ва ўшанда у 3:2 ҳисобида ғалаба қозонганди. 

- Ташкенбай жаҳон чемпиони ҳисобланади. Унинг бундай унвони сизни чўчитмайдими? 

- Унинг чемпионлиги мени чўчитаётгани йўқ. Худо хоҳласа чиройли бокс тушамиз. Аллоҳга шукр, биз ҳам Осиёда чемпион бўлганмиз. Рухий томонлама муаммо умуман йўқ. Қаршимда бундай рақиб турганидан ҳавотирда эмасман. Насиб қилса, чиройли бокс тушиб, ғалаба қозонаман", - деди Нодиржон Мирзаҳмедов Olamsport.com сайтига берган интервьюсида.