Бугун тўрт эркин курашчимиз жаҳон чемпионатида гиламга чиқади. Ғуломжон бронза йўлида курашади

Кеча дунё биринчилигида эркин кураш баҳслари бошланди. Ҳамюртларимиздан биргина Ғуломжон Абдуллаев медаль учун курашиш имкониятини қўлга киритди. Париж-2024 Олимпиадаси бронза медали совриндори 1/16 финалда Корея Республикаси вакили Ким Чанг Сонгни 6:0, 1/8 финалда Пуэро-Рико курашчиси Смитни 6:2 ҳисобида мағлубиятга учратди. Муросасиз кечган 1/4 финал беллашувида эса россиялик Олимпиада чемпиони Завур Угуевга 2:3 ҳисобида имкониятни бой бериб қўйди. 

Угуев финалга чиққани боис, Ғуломжон бронза медали учун курашиш имкониятини сақлаб қолди. Бунинг учун у бугун ўтиш беллашувида КХДР вакили Кванг Мёнг Кимга қарши гиламга чиқади. Абдуллаев ғалаба қозонган тақдирда жаҳон чемпионатининг бронза медали учун баҳс олиб боради. 

Шунингдек, бугун яна уч нафар эркин курашчимиз - Асадбек Саидтўраев (-57 кг), Жавоҳир Чулибоев (-74 кг) ва Мирзо Ҳайитов (-79 кг) жаҳон чемпионатидаги юришини бошлайди. 

Эслатиб ўтамиз, жаҳон чемпионатида иштирок этган Рустам Ассакалов бош мураббийлигидаги юнон-рум кураши бўйича Ўзбекистон терма жамоаси умумжамоа ҳисобида учинчи ўринни эгаллаганди.