Оғир атлетика бўйича "Ўзбекистон Республикаси Мустақиллиги кубоги" олдидан матбуот-анжумани ташкил этилди

Иштирокчиларни қизиқтирган саволларга Ўзбекистон оғир атлетика федерацияси биринчи вице-президенти Шахрилло Маҳмудов жавоб берди.     

Мусобақадаги натижалар, ҳусусан турли рекордлар қайд этилган тақдирда улар ҳисобга олинадими? 
Июль ойи аввалида биз онлайн халқаро мусобақада иштирок этдик. Бизнинг вақтимиз билан мусобақа ярим тунда, тонг отишига яқин бўлишига қарамай, жиддий муаммолар бўлмади. Ушбу мусобақа орқали спортчиларимизнинг ҳолатини яна бир бор синовдан ўтказиб олдик. Бўлажак мусобақада қайд этиладиган барча рекордлар инобатга олинади. Халқаро оғир атлетика федерацияси ҳам мусобақадан аввал допинг-тест ўтказилган тақдирда, натижаларни ҳеч қандай муаммосиз тан олади.

Ташкилотчилик масалалари қай даражада олиб борилди? Мусобақа давомида алоқа билан, бевосита интернет билан муаммолар юзага келмайдими? Турли хил кутилмаган вазиятларга қанчалик тайёрлана олдик деб ўйлайсиз?
Бир неча кун олдин тест режимида алоқа ўрнатдик, унда дунёнинг кўплаб мамлакатларидан спортчилар билан боғландик ва барчаси кўгилдагидек ўтди. Тайёргарлик борасида гапирадиган бўлсак, электр-энергияси билан юзага келиши мумкин бўлган муаммоларга тайёр бўлиш ниятида, махсус қурилма тайёрланди, худо хоҳласа, бу борада муаммо бўлмайди. Бундан ташқари мусобақа учун махсус дастурдан фойдаланамишни режалаштирганмиз.

Мусобақани тўлиқ эфирга узатиш осон эмаслигини тушунамиз, лекин ОАВ вакиллари учун қизиқ савол, СПОРТ телеканали орқали вакилларимизнинг чиқишлари тўлиқ олиб бериладими? Бу борада қандай ишлар амалга оширилди?
Зохид Каримов: Трансляция борасида муаммолар бўлмайди. Бу борада зарур тайёргарлик кўрилди. Телеканалимиз ҳам онлайн мусобақаларни эфирга узатиш режимига кўникиб боряпти. Оғир атлетика мусобақаси дастурлар режасига киритилган ва вакилларимизнинг чиқишлари эфирга узатилади.

Нега Муаттар Набиева бир ойдан кўпроқ муқаддам бўлиб ўтган мусобақада иштирок этмаганди? 
Муаттар маълум вақт давомида оиласи даврида бўлиб қайтди ва ўша вақтга келиб у халқаро мусобақада ўзининг даражасида иштирок этишга тайёр эмасди. Лекин у аёллар терма жамоамиз етакчиси бўлиб қолаверади ва бўлажак мусобақада юртимиз шарафини ҳимоя қилади.

Адҳамжон Эргашев гоҳ у, гоҳ бу вазн тоифасида мусобақаларда иштирок этмоқда. Бунинг сабаби нима ва қачон бу каби тажриба ишлари якунига етади?
Адҳамнинг турли хил вазнларда супачага чиқишининг сабаби қандайдир тажриба ўтказиш эмас. Спортчи вазн ташлаши осон жараён эмас. Ҳар ой, ҳаттоки ҳар кварталда вазн ташлаши истаймизми йўқми, унинг саломатлигига ҳам салбий таъсир ўтказади. Шу сабабли, биз бу мусобақада атлетнинг қийнамасликка қарор қилдик. Адҳам билан асосий мақсадимиз олдинда турган Токио Олимпиадасида ижобий натижа кўрсатиш ҳисобланади.  

Мусобақа совриндорларини тақдирлаш жараёни қандай кечади? Ғолибларга медаль топшириладими, чемпион шарафига мадҳия янграйдими?
Бу борада ҳам тайёргарлик кўрилган. Ҳар бир иштирокчининг расми тайёрлаб қўйилган. Ғолибларга рамзий медаллар топширилади ва уларнинг шарафига онлайн режимда мадҳия янграйди. Кўрамиз, балки айнан бизнинг мусобақа пойдевор вазифасини ўтаб, кейинги турнирларда медалларни етказишни ҳам йўлга қўярмиз.

Онлайн матбуот-анжумани якунида Миллий олимпия қўмитаси президенти Рустам Мавзурович Шаабдураҳмонов ўз фикрлари билан ўртоқлашди:

“Ассалому алейкум, ҳурматли конференция иштирокчилари. Сизларни мана шу тадбиримизда кўриб хурсанд бўлдим. Ҳозирда спортимиз тўхтаб қолгани йўқ. Барча онлайн бўлса ҳам машғулотларни давом эттирмоқда. Айни кунларда Мустақиллигимиз байрами муносабати билан стол тенниси, камондан отиш, Паралимпия турлари ва бошқа йўналишлар бўйича бўйича мусобақалар ўтказилмоқда. Буларнинг барчаси тест режимида олиб борилмоқда. Асосий мақсадимиз – барчани соғлом турмуш тарзига жалб қилиш. Бундай тадбирларимиз спорт мухлисларига мотивация бўлиши керак”.

Эслатиб ўтамиз, мазкур мусобақада дунёнинг 32 мамлакатидан 150 нафарга яқин полвонлар ғолиблик учун баҳс олиб боришади. Улар орасида Олимпиада ва жаҳон чемпионлари Зулфия Чиншанло (Қозоғистон), Луис Москера (Колумбия), Ли Веньвень (Хитой) каби номларни кўриш мусобақага бўлган қизиқишнинг не чоғлик улкан эканини кўрсатиб турибди. Ўз навбатида, Адҳамжон Эргашев, Акбар Жўраев, Муаттар Набиева каби номдор вакилларимиз ҳам ўз вазн тоифаларида ғолиблик учун кураш олиб боришади.