Олий лига-2017. Янги мавсумга қуръа ташланди

Тадбирни Фарҳод Магаметов кириш сўзи билан очиб берди.

“Барчани янги йил билан табриклайман. Янги йил барчага омадли келсин. Қисқа тарзда якунланган мавсум ҳақида тўхталиб ўтамиз ва янги мавсум ҳақида маълумотлар берамиз.

Афсуски, бугунги кунга қадар биронта клуб ПФЛга таклиф билан чиққани йўқ. Бу мавсумда “Андижон” охирги ўринни олди ва кейинги йил биринчи лигада ўйнайди. “Навбаҳор” эса олий лигада қолиш учун баҳсда “Норин”ни мағлуб этиб, элитада қолишга эришди.

22та гол урган Темурхўжа Абдухолиқов олий лига тўпурари бўлди. 2016 йилги мавсумда 10 мамлакатдан келган 51 нафар легионер рўйхатдан ўтказилди. Йил бошида Ўзбекистон Суперкубоги баҳси ўтказилганди. Унда “Насаф” ўз тарихида илк бор Суперкубок соҳиби бўлди.

“Локомотив” эса бу йил ҳам чемпион, ҳам кубок соҳибига айланди. Афсуски, томошабинлар ташрифи ўтган йилгидан камайди. Бундан ташқари, турли сабабларга кўра ПФЛ тақвимида кўплаб ўзгаришлар содир бўлди.

Бунга етарли сабаблар бўлган эди. Биз ҳам тақвим ўзгармаслиги тарафдоримиз. Аммо халқаро ўйинлар туфайли ўзгаришларга мажбур бўлдик.

ЎФФ президенти ёрдамида иккита янги кубок олиб келинди. Улардан бири Ўзбекистон чемпионига, иккинчиси Ўзбекистон кубоги соҳибига топширилади. Улар энди доимий равишда ғолибларга топширилади. Иккала кубок ҳам қиммат металлардан ясалган.

Якунланган мавсумда Ғузорнинг “Шўртан” клуби тушиб қолган вазиятни барча билса керак. Легионерга маошини бермагани учун ФИФА бизга клубдан 3 очко олиб ташлашни талаб қилди. Биз шундай қилдик ҳам. Якунда нима бўлди? “Шўртан” ҳам 3 очкодан айрилди, ҳам ўша пулни барибир тўлаб берди.

Олий лига. 4-5 март. 1-тур

"Машъал" - "Локомотив"

"Бухоро" - "Олмалиқ"

"Бунёдкор" - "Сўғдиёна"

"Пахтакор" - "Қизилқум"

"Қўқон-1912" - "Насаф"

"Металлург" - "Динамо"

"Шўртан" – "Нефтчи"

"Навбаҳор" – "Обод"