Олот дзюдо мактаби асосчиси Рустам ака Тўраевни табриклаймиз!

Юксак маънавият ва маърифат соҳиби бўлган Рустам Тўраев бир нечта авлод дзюдочиларига устозлик қилдилар ва бу жараён бугунги кунда ҳам давом этмоқда. Шогирдлар орасида Ришод Собиров, Рамзиддин Саидов, Фарҳод Тўраев, Камол Муродов каби машҳур дзюдочиларимизни алоҳида таъкидлаш жоиз.    

Рустам Тўраевнинг фарзанди Фарҳод Тўраев ота изидан бориб, Ўзбекистон дзюдоси тарихидан жой олишга муваффақ бўлган. У 1999 йили Англиянинг Бирменгем шаҳрида ўтказилган жаҳон чемпионатида кумуш медални қўлга киритган. Бу билан кичик Тўраев жаҳон чемпионатида шоҳсупага кўтарилган биринчи ўзбек дзюдочиси сифатида тарихга кирган.

Шогирдлар орасида етуклик даражасига чиққанлардан Ришод Собиров икки карра жаҳон чемпиони, 2008, 2012 ва 2016 йилларда ўтказилган Олимпия ўйинларининг бронза медали соҳиби ҳисобланади. 

Рустам Тўраевнинг кўп йиллик меҳнати ҳукуматимиз томонидан муносиб баҳоланган. Бугунги кун қаҳрамонимиз Ўзбекистон Республикасида хизмат кўрсатган мураббий унвони ҳамда "Эл-юрт ҳурмати" ордени билан тақдирланганлар.

Фурсатдан фойдаланиб, Рустам Тўраевга узоқ умр, сиҳат-саломатлик тилаймиз. Илоҳим, кўп йиллар фарзандлар, набираю чеваралар, шогирдлар роҳатини кўриб юрсинлар!

Ўзбекистон дзюдо федерацияси матбуот хизмати