Ўзбекистон клуби КХЛда иштирок этадими? Olamsport.com аниқлаштиради!

Olamsport.com сайти мухбири Азиз Тўхтамуродов ушбу хабар ҳақиқатга қанчалик яқин эканлигини билиш мақсадида "Бинокор" жамоаси бош мураббийи Алишер Азимов билан алоқага чиқди.

"Айни пайтда маҳаллий ёшлардан иборат жамоамиз бор. Улар пойтахтимиздаги муз саройларининг бирида машғулот олиб боришяпти. Йигитлар Қозоғистондаги турнирларда қатнашиб келишмоқда", - дея сўз бошлади Азимов.

Бундан бир неча ой муқаддам ижтимоий тармоқ орқали чет элда хоккей билан шуғулланаётган ўзбекистонликларни жамоамизга жалб этиш мақсадида эълон бергандик. Ана шундан сўнг дунёнинг турли мамлакатларидан бизга мурожаатлар бўлди. Уларнинг аксарияти айни пайтда Россияда хоккей билан шуғулланаётган юртдошларимиз эди. Шунингдек, АҚШ, Беларусь, Қозоғистонда яшаб, хоккей ўйнаётган ватандошларимиз ҳам "Бинокор" шарафини ҳимоя қилиш истагини билдиришди.  



"КХЛ? Албатта, бундай ғоя режамизда бор. Барчаси "Хумо" аренаси очилганидан сўнг аниқ бўлади. Очилиш маросимида биз ўзбек хоккейчиларининг нималарга қодир эканлигини намойиш қилиб бермоқчимиз. Мақсадимиз жиддий. Насиб қилса, ўзбек жамоаси Континенталь Хоккей Лигасида иштирок этади. Бунинг учун йигитларимизнинг куч ва иқтидорлари етарли.



Режага кўра шу йилнинг ўзидаёқ Ўзбекистон хоккей федерацияси очилиши керак. Ана шундан сўнг биз Халқаро хоккей федерациясига аъзо бўлиб, қитъа ва жаҳон миқёсидаги турнирларда иштирок эта олишимиз мумкин", - деди Азимов.

Маълумот учун:

Азимов Алишер Акрамович

1968 йил 10 октябрда Тошкент шаҳрида туғилган.

- Ўзбекистонда хоккейни қайта ташкил этган.

- "Бинокор" хоккей клуби таъсисчиси

- "Бинокор" хоккей клуби бош мураббийи.

Ўз вақтида "Бинокор"нинг болалар спорт клубида хоккей сир асрорларини ўрганган. Чет эл хоккей лигаларида легионер сифатида ўйнаган.