03 янв 16:28
Янгиликлар

Бокс/ММА

Пакьяо ҳам Мейвезернинг жангига муносабат билдирди

Саккиз вазн тоифасида собиқ жаҳон чемпиони Мэнни Пакьяо америкалик енгилмас боксчи Флойд Мейвезернинг куни кеча Японияда ўтказган жангига ўз муносабатини билдирди.

Мейвезер Саитама шаҳрида япониялик кикбоксчи Тенсин Насукавани бокс қоидалари асосида ўтказилган кўргазмали жангнинг биринчи раунд иккинчи дақиқасидаёқ техник нокаутга учратган эди.

“Бу жангга Янги йил ҳазили сифатида қарадим. Мен Флойддан фарқли равишда гавдаси йирик, камида ўзим каби боксчилар билан жанг ўтказаман. Нима демоқчи бўлганимни билдингиз-а?”, - деди Пакьяо.

Эслатиб ўтамиз, Мэнни айни пайтда АҚШнинг Лос-Анжелес шаҳрида ўзининг 19 январь кунига белгиланган жангига тайёргарлик кўрмоқда. Филиппинлик боксчи тўртта вазн тоифасида жаҳон чемпиони Эдриэн Бронерга қарши жангига тайёргарлик кўряпти.