"Пахтакор" янги футболчиларни таништирди

Матбуот анжуманида "Пахтакор" янги ҳарид қилган футболчилар: Элдорбек Суюнов, Шерзод Аъзамов, Забиҳилло Ўринбоев, Гиди Канюк (Исроил), Тиаго Безерра (Бразилия) қатнашишмоқда.

Анжуманда шунингдек, клуб президенти Бобур Шодиев, бош директор Адисман ҳамда бош мураббийи Шота Арвеладзе иштирок этишмоқда.

"Барчага салом. Жамоамиз иккита легионер ва учта маҳаллий футболчиларни жалб қилди. Улар келажакда "Пахтакор"ни шонли тарихини қайтаришда, жамоамизнинг ютуқларида ўз ҳиссаларини қўшишларига умид қиламиз ва ишонамиз", - деди бош директор Адисман.

"Ажойиб футболчиларни таркибимизга қўшиб олганимиздан хурсандмиз. Нафақат маҳаллий, балки легионер футболчиларни ҳам жамоамизда кўриб турганимиздан қувончдамиз", - дея ўз фикрларини билдирди Шота Арвеладзе.

Дастлаб легионер футболчилар Гиди Канюк ҳамда Тиаго Безерра клуб билан расман шартномаларга имзо чекишди.

Гиди Канюк "Пахтакор"да 52-рақамда ўйнайдиган бўлди. Тиаго Безерра эса 77-рақамни маъқул кўрди.

"Биз "Пахтакор"ни кучли ва шонли тарихга эга эканлигини биламиз ва жамоани шонли тарихини қайтариш йўлида кўмаклашгани келдик", дейди исроиллик футболчи Гиди Канюк.

"Туркияда ҳам "Пахтакор"ни жуда яхши билишади. Шота Арвеладзе эса жамоа бошқарувига ўтгани ажойиб иш бўлди. Арвеладзенинг таклифига кўра "Пахтакор"ни танладим. Ўйлайманки, жамоа билан биргаликда кўплаб ғалабаларни қўлга киритамиз. Бу йилги мақсад жамоани ОЧЛга қайтариш. Келаси йил эса барча мусобақаларда ғолибликни кўзлаймиз", - дея ўз фикрлари билан ўртоқлашди Тиаго Безерра.

Энди навбат маҳаллий футболчилар билан шартнома тузишга келди.

Журналистлар кўз ўнгида Элдорбек Суюнов, Шерзод Аъзамов ҳамда Забиҳилло Ўринбоев клуб билан шартнома имзолашди.

Элдорбек Суюнов 25-рақамни, Шерзод Аъзамов 70-рақамни, Забиҳилло Ўринбоев эса 71-рақамни танлади.

"Авваламбор "Пахтакор"дан чорлов бўлди ва бу таклифни менга ёққани учун бу жамоани танладим. Рақобат кучли бўлгани яхши, бу биз учун фойдага ишлайди", - деди Забиҳилло Ўринбоев.

"Пахтакор"га ўтишимга асосий омил жамоада руй бераётган ўзгаришлар. Бу Ўзбекистон учун янгилик. Менга "Пахтакор"нинг янги лойиҳаси ёқди, айнан шу нарса мени бу жамоага келишимга асосий сабаб бўлди. Рақобат? Мен рақобатдан қўрқмайман, бу биз учун фойдали бўлади", - деди Элдорбек Суюнов.

"Жамоамиздаги иккала дарвозабон ҳам менга ёқади. Рақобат кучли бўлгани яхши, шунда ҳеч бир дарвозабон бўшашишга ҳаққи йўқлигини билади", - дея дарвозабонлар хусусида ўз фикрларини билдириб ўтди Шота Арвеладзе.