Покистон делегацияси вакиллари ШҲТ йиғилишида қатнашиш учун Тошкентга етиб келишди

Мазкур йиғилишда иштирок этиш учун пойтахтимизга ШҲТга аъзо давлатларнинг жисмоний тарбия ва спортни ривожлантиришга масъул вазирлик ва идоралари раҳбарлари Тошкентга келишни бошлади.

Жумладан, бугун эрта тонгда Покистон Ислом Республикаси вилоятлараро мувофиқлаштириш вазири, спорт кенгаши Президенти Эхсан ур-Раҳман ҳамда Покистон вилоятлараро мувофиқлаштириш вазирлиги директори Муҳаммад Ибрар Хан юртимизга ташриф буюришди.  

Покистон делегацияси вакилларини Ўзбекистон Республикаси спортни ривожлантириш вазири ўринбосари Абдулла Асланов бошчилигидаги масъуллар кутиб олишди ҳамда меҳмонларга Ўзбекистонга ташрифи учун миннатдорлик билдиришди.

Эслатиб ўтамиз, мазкур йиғилишда ташкилотга аъзо мамлакатларда жисмоний тарбия ва спортни ривожлантириш учун қулай шарт-шароитлар яратишга кўмаклашиш, жисмоний тарбия ва спорт орқали дўстона алоқаларни мустаҳкамлаш, спортчиларни халқаро мусобақалардаги муносиб иштироки учун рағбатлантириш, Олимпия ҳаракатини ривожлантиришдаги ҳамкорликни мустаҳкамлаш масалалари муҳокама қилинади.

Шунингдек, келгуси йилларда бўлиб ўтадиган спорт мусобақаларига тайёргарлик кўриш, уларни юқори даражада ташкил этиш бўйича бир қатор масалалар юзасидан музокаралар бўлиб ўтиши режалаштирилган.